Fjöldaflótti að bresta á!!

Hræddur er ég um að þetta sé bara smjörþefurinn af því sem koma skal ef ekki á að koma til móts við  skuldugan og í alltof mörgum tilvikum skuldugan almenning. Þau úrræði sem hefur verið boðið uppá hingað til , þ.e., frysting og lenging lána, líkist einna helst því að pissa í skóinn, hlýjar augnablik en veldur síðan enn verra ástandi. Það verður að koma betur á móts við fólk ef ekki á að missa þá úr landi sem sjá betri lífsgrundvöll erlendis, fólk sem sér fram á að vera að missa allt sitt hér og sitja samt áfram í skuldafjötrum. Það er enda engin hemja að lánardrottnar taki ekkert af 100% hækkun gengistryggðra lána á sig, heldur ætli lántaka að taka hana á sig alla en sitja sjálfir tjónlausir eftir. Lánastofnanir verja sig reyndar með því að segjast hafa varað lántakendur við gengisáhættu, en gleyma að nefna að í flestum tilvikum hvöttu þær sjálfar til slíkrar lántöku, því krónan væri "traust" og vextir miklu lægri. Ég tel það það sanngirniskröfu að lánastofnanir taki á sig amk. 50% af gengisáhættunni sem þær voru vel meðvitaðar um, og hvet hið háa Alþingi til að setja lög er tryggi það, bæði á þau lán sem fyrir eru og eins ef svo ólíklega vill til að almenningi bjóðist aftur að taka gengistryggð lán í vonandi væntanlegu betra tíðarfari.

Loks verður að fara að lækka vexti svo fólk og fyrirtæki geti staðið undir afborgunum, og einhverjir aðilar treysti sér í fjárfrekar atvinnuskapandi framkvæmdir að nýju. 

Íbúum á Íslandi hefur fækkað

Athugasemdir

[Arndís (IP-tala skráð) 19.8.2009 kl. 09:58]

Hvað segir þetta þér:

„Milli 1. júlí 2008 og 1. júlí 2009 fjölgaði íbúum í öllum landshlutum, að frátöldu Austurlandi (-8,2%) og Vesturlandi (-0,6%). [...] Á höfuðborgarsvæðinu búa nú 63,1% þjóðarinnar og fjölgaði íbúum þar milli ára um 629 “ (leturbr. mínar)

Þetta er ekki hámenntað fólk úr 101 sem veldur fólksfækkun með flótta sínum. Ennþá a.m.k. 

[Jón Ingi Cæsarsson, 19.8.2009 kl. 10:05]

Erlenda vinnuaflið er að fara úr landi í stórum stíl... það er mesti áhrifavaldurinn ... þess vegna er þetta mest áberandi á Austurlandi þar sem stórframkvæmdum lauk fyrri hluta síðasta árs..

[B (IP-tala skráð) 19.8.2009 kl. 10:10]

Arndís: Þessar tölur segja ekki alla söguna um búferlaflutninga vegna þess að áhrif náttúrulegrar fjölgunar þjóðarinnar (fæddir umfram dána) skekkja myndina, t.d. jafngildir fjölgun fólks á höfuðborgarsvæðinu í raun því að mikill brottflutningur hafi orðið af svæðinu miðað við það sem við þekkjum frá síðustu árum. Það verða birtar tölur um búferlaflutninga á föstudaginn og verða eflaust fróðlegar.

[B (IP-tala skráð) 19.8.2009 kl. 10:11]

Það vantaði inn í þetta hjá mér:

"...t.d. jafngildir 0,3% fjölgun fólks á höfuðborgarsvæðinu..."

[Sigurður Gunnarsson, 19.8.2009 kl. 10:45]

Meinleg innsláttarvilla, standa átti: "ef ekki á að koma til móts við  skuldugan og í alltof mörgum tilvikum atvinnulausan almenning."